SBS Samoan - SBS Samoan

E aofia ai i faiga faavae fou nei le auai o sui o nu'u i le filifiliga o tagata e galulue faavaitaimi ma aiaiga i tagata e ta'uleagaina ai le polokalame ma le atunu'u i amio le taupulea ae o galulue ai i Aotearoa Niu Sila ma Ausetalia.

Ua atoa tonu i le vaiaso nei le 60 tausaga talu ona fasiotia le peresitene o Amerika, John.F.Kennedy i le taulaga o Dallas i Texas. O loo tele pea ma anoano tala faatupu i le mafua'aga na fasiotia ai Keneti, ae poo ai mo'i na faatonuina.

E ono faasa'oloto e Hamas nisi o tagata na latou 'ave faapagotaina i le masina na te'a nei, ae ua latou faaalia e tatau ona muamua taofia le osofa'iga a Isara'elu. Ma seisi o tala, e ono tolopo pe suia nofoaga e faia ai nisi o taaloga o le Olimipeka i Paris i le tausaga fou ona o le taua o loo faia nei i le va o Isara'elu ma Hamas.

O loo faatali le malo Samoa e faamae'a muamua su'esu'ega a leoleo ma le faamasinoga o su'esu'ega maliu, le coroner i Ausetalia, ona faato'a faia lea o fuafuaga mo le toe faafo'i i Samoa o tagatanu'u Samoa ia na maliliu i Vitoria i se faalavelave ta'avale ae o iai e galulue i galuega faavaitaimi.

O le Aso Sa o muamua nei, Aso 19 o Novema, e tatala aloa'ia ai taaloga a le Pasefika, le Pacific Games i Honiara i le atu Solomona. Ma o le a auai atu iai se 'au ta'alo e to'a 72 mai Ausetalia. O le a auai atu fo'i iai ma se 'au mai Aotearoa Niu Sila. E pei ona molimauina i taaloga a le Pasefika i tausaga ua mavae, o le 'au mai Samoa o loo faamoemoe i ni pine 'auro ma siliva mai faipelega ma si'i u'amea mamafa.

Ua olioli ma talisapaia e le alaalafaga o Mauga i Savai'i le fesoasoani a le malo i le viliina o le suavai i se pamu ua faato'a to'a ai le alaalafaga mai le 'uti'uti o le suavai mama e pei ona feagai ai i tausaga ua mavae. O lebei atina'e o le a manuia ai fo'i alaalafaga o Samalae'ulu ma Patamea.

Ua talia e le faigamalo i Amerika tuua'iga a Isaraelu i le fa'aaogaina e Hamas o falema'i, ae maise le falema'i tele Al-Shifa e faia ai ana fuafuaga faamilitari ma o loo nana i ana i lalo o le falema'i tagata na 'ave faapagotaina e Hamas i lana osofa'iga o eleele o Isaraelu i le masina na te'a nei.

O se polokalame na sauaina ai nisi o tagata ma na solitulafono le auala na faia ai. O se faai'uga lea a le Komisi su'esu'e, le Robodebt Royal Commission i le polokalame a le faigamalo a le soofaatasiga na te'a nei lea na aoina ai le 'ova i le $750 miliona mai tagata na tuua'ia e le malo na aitalafu i tupe o penefiti. O nei aitalafu na mafua mai i se polokalame computer na fuafuaina totogi o penefiti, ae na iloa mulimuli ane le tele o sese ma faaletonu ma tupu mai ai.

O le saunoaga a le palemia o Samoa, Fiame Naomi Mata'afa, na faasino tonu i le tele o faamatalaga o loo faasalalauina i luga o le Facebook i le mata'upu i se taule'ale'a na maliu i le alatele i le lua tausaga ua mavae ae o'o mai i le taimi nei e le'i maua le taavale ma le 'ave taavale na tupu ai le faalavelave. O loo tuua'ia ai e nisi se sui faipule ua maliu ma le vasega o leoleo ma nisi i le faalavelave. O loo faate'a le tumau ai ni leoleo se to'alua i tuua'iga o le faia o ni su'esu'ega i le faalavelave e aunoa ma se faatagana mai le Komesina ma le faauluuluga o le matagaluega o leoleo.

I se faatalanoaga ma le sui o le SBS Samoan i Apia, na faaalia e le leoleo asiasi Li'o Faataumalama lona tete'e i tuua'iga e pei ona faate'a le tumau ai o ia ma se tasi leoleo i le faia o se su'esu'ega i le maliu o se tama talavou i le 2 tausaga ua mavae e aunoa ma se faatagana mai le Komesina. Ua 2 tausaga talu ona maliu le taule'ale'a i se faalavelave na so'a ai e se taavale, ae o'o mai i le taimi nei, e le'i maua e leoleo ma su'esueina pe molia le tagata na 'aveina le taavale.

O le mata'upu lenei na alia'e mai i se finauga i le va o Levi/Alamutu ma le afio'aga o Afega i fanua faaleaganu'u. O le tagi a Levi/Alamutu o loo aofia ai se faasea i le faipule o Sagaga 2 Maulolo Tavita, o se matai o Afega, atoa ai se faasea ia latou meatotino ma meatoto na faalaeagaina ina ua sua e Afega nisi o fanua o loo finau ai.

Ae foliga mai ua iai ni 'aisi i le maopoopoga o le Forum ina ua le auai iai ta'ita'i o Papua Niu Kini, Vanuatu ma le atu Solomona. O le mata'upu o loo le maua iai se finagalo 'autasi o atunu'u o le Pacific Islands Forum, o le sa'olotoga e feutaga'i ai maliega ma le faigamalo i Saina.

Ua a'afia ai feso'ota'iga i le telefoni, imeli ma le 'upega tafa'ilagi a le faitau miliona o tagata i Ausetalia na faalagolago i 'au'aunaga a OPTUS.

Na saunoa le minisita o loo gafa ma le kamupani vaalele le Samoa Airways, Leatinu'u Wayne Fong, o loo feutaga'i ma le kamupani le Fiji Airways se maliega e faatau ai e le Samoa Airways nofoa i faigamalaga a le Fiji Airways. Na saunoa foi le minisita e le toe faatauina se vaalele tele a le Samoa Airways ona e le fia auai le faigamalo i ni pisinisi e gau.

Ua amata le osofa'iga i lau'ele'ele a le vaega'au a Isara'elu i le Gaza mau lipotia mai le to'atele o tagata ua maliliu. E tusa ai ma se faamatalaga maio le matagaluega o le soifua maloloina i le Gaza ua 'ova i le 8,500 tagata ua maliliu, o le 'ova i le 3,500 o i latou o tamaiti.

Ua fautuaina e se komiti faa-palemene na iloiloina teuteuga o le tulafono o faigapalota, le toe fo'i o nisi itumalo i le fa'a-alaalafaga e aloa'ia ai o latou so'otaga faaleaganu'u e pei o Sale'aula ma Salamumu. Ua fautuaina ai fo'i le tolu o itumalo palota i Apia - Sasa'e, Ogatotonu ma Sisifo.

O se faalavelave na tupu ina ua sa'e le va'a na alu ai se faiva taga palolo a ni taulele'a o Poutasi Falealili, na maliu ai Toetu Aoina ma e le'i toe maua lona tino maliu. Faafofoga i le ripoti a Galuemalemana Autagavaia mai Apia.

Ripoti a Galumalemana Autagavaia mai Apia.

Ua tatala aloa'ia le maota mo galuega atina'e a le afio'aga o Lauli'i, o se tasi o vaega o fuafuaga mamao o loo fa'aaogaina iai le $miliona mai le malo.

Se talanoaga a le ta'ita'ifono o le Lakapi Liki Samoa, Fiu Ponifasio Vasa, ma le sui o le SBS Samoan i Apia, Galumalemana Autagavaia Tipi Autagavaia.